Oleh : Dr. Joni, MN
Gayonese Documentary – I masa wan tengah pengengkunen, ralan pe tengah langkah sentat, tengah galak beledak. Ine pe ku ume mumiyo tumpit, si kerna rom pe nge seroh, ama pe ku mpus murayi utem sesiro mubebes kin rege ni bombom no si sekulah lang. Abang si sulu bere si kerna we nge mulo kul, buete pe male – male dis orum ama, munango wih, muningo, mejen mujerang, si gantine mungengkun, mejen sawah mumiyo pe we, mujeme wih ni ume pe we.
Si suluru bere, meh kedelen ne, gere sawah ate munosah kin ngi-ngi e si gere jerohe, dele si sulu bere i tengah mungengkun ara demu gelime, oya si metuh a i basuh ne mulo, i bersih ne, baro osan ne ku engi si tengah imen ne ya. Ni se si gere jeroh ne si i pangane, mejen gere pe neh i basuhe.
Beluh ku empus si gatin ne si sulu bere ni si i kin-kin, rayi siye, uweten so, kengkun ko mulo adik ma, jege i engi e ne si tengah nome i ayun i atan caban ni gelime orum opuh kerung. Mongot engi e ne jege gerle we kadang, oya si sulu bere ne si kona gerantang. Engie nw beluh dediang sangka-sangka musungkep renye mongot, oyape we si sulu bere ni si kona gimit ling miyen ku atas ne.
Dele ilen ike i ceriten sana si buwet ni sulu bere ari urang tue. Cumenike meh kul engi-engi e ne, ara we mubilangen jemae sikep ni engi-engi e oyane nge lagu si gere neh, si kerna nge bebuet mujadi PN atawa Honor i PN, renye cerak ne pe ku abang atawa aka si sulu bere ne nge we paling,. Mejen mera we nge lagu musuhe si sulu bere ne, ara we mumerin abang atawa aka e si sulu berene “dungo”, ” Lelet bepikir”, “deletu pertimbangen” ara miyen si mumerin, “eleh oya ke terih kin si benen” dele ilen si len-len pe.
Sikep rum cara e bepikir gere betih ni engi e ne oya bewene si kerna we, kerna i masa mungengkun gati kone gimit mejen sawahbreman kulit ni tuke e, gerantang si gatin ne miyen ku atas ne, oyale si nge musara kuwan dirie lagu nge mujadi sipete dak sawah ku kul atawa sawah ku tue e. Inget si sulubere nume impel win, ipak suderenku.
Dele ilen tangung jeweb ni si sulu bere kin engi-ngi e si gere terceriten ilen. Betul gere bewene si sulu bere lagu noya sipete, ike beta pe we nume impel, cumen meh kedelene si sulu bere ni lagu si wan cerite si atas so le si buwet te. Ingeti abang/ atawa pe aka si sulu bere, enti bunun we kin impel, enti renye sikepte pe lagu kune kenak kin pake oya, bierpe kite nge mupangkat, atawa nhe besekulah atas, renye mureta dele, ike sulu bere oya tetap sulu bere, gere neh ara mu abang atawa engi, ike si bensu tetap we oya si bensu, gere neh ara engi ni si bensu.
Enti cecengisen, jis, jengkat ku si sulu bere, cekot perot pe ke diye we, ike mulintang we gere gere kite betih pe kune kin deniye ni. Sibsulu bere ni nume le impel, atawa lakun.
*penulis adalah Wakil Ketua 1 Al Washliyah Takengon
[SUMBER]
