TEKS: Melengkan Menerime Rempele

0
352

Sumber: Bpk H. Darmawan

Bpk H. Darmawan

Bpk H. Darmawan

Assalamualaikum Warahmatullahi Wabarakatuh…..

Bapak gecek kepala kampong…………………….tengku guru rejeni kami daleng kolak seserenen kayu rubu pelongohen beserta sarak opat ni ama reje si timang berat sijuel murege si kami hormati.

Sudere-suderengku alang bertolong si berat berbantu beserta ama ine tetue ni kami si wajeb tetah si perlu tentu ton ni kami tedet tempat ni kami menye(bemenye) si kami pemuliei.

Kaom moslemen kaom muslimat sikot patot si layak laku si ara i batang ruang si mubahagie.

Orom-orom mulo kite munyawahen puji syokor ku Allah SWT si nge munosah limpahan(limpahen) rahmat orom kurniae ku kite terutama berupe kesehatan(kesehaten) orom kelapangan(kelapangen) sehinge kite depet morom i batang ruang ni wan keadaen sehat wal afiat delem(wan) rangka penyelesen ni janyi(berselese janyi) antara masyarakat………………(kampong polan)………………orom masyarakat………………(kampong polin)……………… .

Selanjote selawat orom salam gere lupen kite sawahen kujonjongente nabi besar Muhammad SAW beserta sehebet orom keluargae karna(kena) payah pedi nge rasol jonjongenteni berjuang(bejuang) ari si gelap nge ipinahne kite kusiterang, ari tempat sikaret nge iyesotne kite kusilapang, ari arol sirenah hine nge itatangne kite kupematang siatas mulie.

Salah satu dene ken soloh terang itarengne ku kite membina keluarga sakinah berdasar akad nikah sah Insya Allah porami male kite saksenen orom-orom.

Ama reje…..kami atas nama masyarakat………………(kampong polan)………………munatangen jejari sepoloh ku reje ampon ku Allah maaf kutuah bahgiente karna(kena) kami male munyawahen keber singket cerite selalu berupe cerak kire sara patah orom peri kire sara kalimah. Karna delah si gere bertulen, ipon si gere berbelide, terlebeh mien ken beber si gere berdeku, mongken kase iwan cerak sara patah orom peri si sara kalimah ni ara we si patot tar mulo nge kupuren, si layak kukiripe mera we muputer kukuen, ini gelah berejen ama reje mumaafne. Ereng ni daripada oya harapan(harapen) kami tiro ike ken pantase gelah kase berulo, ike ken lememe keta gelah bertona.

Ama reje…..atas nge tangkok ni bor, relem nge kire keleh ni arol, atas berkat do’ante orom-orom, ngele selamat semawah ama reje ku batang ruang ni kami isien, orom erengen naru tenamonen kol. Beta geh ni ama reje, betawe si depeti ama reje isien, si ngok iperen ara kadang tulu curake, ara si tetue si nge munemah talok idene orom rege ni bedene, ara si memude si tengah munemah gagak gegeke orom porak ni rayohe, ara si kekanak kucak sitengah munemah galak rancalne orom dagi ni perasate. Kune metehe mudetak kadang roroh ni tete, mudenget kadang tulak ni pintu, inipe gelah berejen ama reje mumaafne.

Selanjote atas wajeb tetah perlu tentu ni sokot besinte isien, kire ngele mongonol ni ama reje kuatan ni tete si rapat jalene, nge mulongohni ama reje kutoyoh si musupu sirapat semate, delempon beta ara we kadang si patot ku uken nge kami konolen kuduru, si berat matape kadang mera we mudemu siku, inipe gelah berejen ama reje mumaafne.

Ama reje….teringet kami ken manat ari tetue, peri mestike ari negri Antara orom ken kata pusaka ari negri Linge, toh tebok jele kemang ken ganti ni kolet manes kacu bunge lawang, jejari sepoloh ngele kami tatang, kati enti bang ken utang denie orom akhirat. Terteb bermejeles (bermajles) umet bermulie, ngele kite bersijurahen mangas, keranam pirak batel tembege. Ike munorot mangas si jurah ni ama reje ku kami, setelah kami engon ngele meh ara, setelah kami rasa nge cokop semperne, gere ara ne cacat orom cupee, singok iperen si ageh-agehe. Te kune mien karna ara mangas si kami jurahen oyane, ike beloe ngele tomong gagang, pinangepe nge bereden kapor poteh lagi berseh, berpeleh kire kacue pe. Kune metehe emongtu bang kadang beloe ari si nge munge, ide tu kadang pinange ari si nge lalu, kelat tu kadang konyele ari singe telah sudah, apak tu kadang kapore ari singe-nge, karna ini bewene gere kami sejen, ike salah ku Tuhen kami tobati ike salah ku reje keta kami tiro maaf.

Ama reje….laher kire buah ate jantong rasa ken ules nome tawar ni mata, iwan relengen gere mugegerak, iosah keroe awal tasak, iperen gerale budak. Sawah pitu lo iaran kenduri si lungi lemak, italu sudere orom biak, iboboh gerale si jeroh cacak, buge nge kol mumengen cerak, ini le harapan(harapen) ari kite jema tue.

Sawah kire ketike ijulen kumersah, iserahen ku tengku guru, munontot ilmu oya siturah karna(kena) beta perintah ari agamante. Ike munorot ilmu siperahe ara seba si nge demue tape dele pedi si gere ilenne. Inipe selapes kite ucepen Alhamdulillah, mupestak bang kire kase pejer, mubiner bang kire matani lo, orom-orom kase kite mumerahi eneh si mumatae.

Ari serlo kuroa lo ulenpe mupinah, tonpe nge mugeganti, ari meh kemokotne ike munorot penengonte gere ne patot pesesok sara tapak, gerene layak pejejek sara saka, ringen kiree berberat waros kiree berwajeb, sinte kenaken berluah. Ta kerna detor ni pungi i Kala Serempah kati temol ni serlah i Rejewali, karna toron uren simunemah basah, gumpel ni emon si munaso nami. Muninget kite ken firman ni Allah oya kati turah bang kene sunnah ni nabi. Nge takder kukite heme, bunge irai kera, geh ni budi bang kadang ari basa. Inipe kusi bijak merawe beroleh kata, keta kusi pantas merawe beroleh saka.

Ama reje….pepien ulen sikukodokni ara le asal buah ate jantong rasa ari………………(kampong polin)………………, diang-diang bang ku Birah Panyang, panang-panang ku Ujung Baro, tersesino ku parabuang, singah bang matae ku ojong ni lepo. Berakah ijoyah mungenaken uah, teremah kuumah simuruang, sene itelege mungalei bunge tibe kuelem-elemen si mudodok ni tenge. Sene bubak sene telege sene ni kekanak nge sawah ku kite tetue. Ta karna ara manat ari tetue ike muraleki buet turah ari perdue, ike munotong rara turah ari dapore. Katinti bang kase jerilep ni gule iobon ken pelolos ni mangan, cereng ni pengpe iobon ken penjelas ni utang.

Do’a mutali sempena mutengeren, berlangkah kire sitetuente ari………………(kampong polin)………………, berdediang berkekede, tercecerak mumerah biak, terkekune mumerah sudere, sesire mumaren amal tedor orom nipi jege, ken penampong ni bade ampel ni kuyu, ken sarat ni kuet orom ken tene yaken.

Nge pien ingi ari one, ike munorot amal tedor orom nipi jege sine, gere sijeroh gere si kotek, singok iperen terhinge-hinge ken uah ni bemen rasa-rasae ipangan iken, beta kata oleh ni tetuente i………………(kampong polan)………………ni.

Ari bulet ni pakat tomong ni peden antara Toa kire orom Uken (antara kampong polan kire orom kampong polin), ken kupe gere orom jema, simehate antara kite we orom kite. Betetah kire kite, nemah mupakat kire cerite, ike munorot jenojong ni ulu si ageh-agehe, ike tenemeng ni pungu betawe sedemikien, singok iperen ike kebet sara lie ike ruje sara benang, poteh berbilang, ini Alhamdulillah ngele kite bersiwajeben. Keta koneng betimang Insya Allah porami kase orom-orom kite timang.

Ama reje…..ilanget bintang tojoh, itoyoh kal pitu mata, i Uken telege pitu mata, i Toa ueh pitu kuala, umah pitu ruang, pemulang pitu perkara, edet bak potemerhom, okom bak Syiah Kuala. Okom sigere penah pipet, edet si gere penah bele, mateni okom iwan ijtihed, mateni edet iwan istana, beta manat ni muyang mersa ku kite.

Lagu peri ni ama reje sine, ibilangen sijeroh ketike sibiseni, nge rempak kite umpama pocok, jeram umpama tunes, ike kulanget kite nge mupocok kemang, ike ku bumipe ngele mujantan tegep. Tares nama keremen, rempele nama wojote, potehe gere karna pucet, iteme gere karna engkilet, atase gere ne sisetai, renahe gerene si jengkali, ipanang keta gelah sareh, i engon keta gelah selese. Segermi mien lagu peri ni ama reje sine, tares nama keremen, rempele nama wojote, i lelah ni si tulu tepang, berules opoh kerawang, ini si serah ni ama reje ku kami.

Delempon beta enti kase nge munge umah meleng kase pepalu, nge munge mungaji nuke kiteb tengku, keta temetap mulo reje sekejep seketike, gelah mungune mulo aku kukuen orom kukiri….. . Alhamdulillah, keta si serah ni ama reje ngele kami terime.

Ta sanawe, karna serde ku ojong Aceh inget ku Bontol Linge, cerak ni merawe musanyor orom muserpeh, keta lebehe gelah beruet, kurange kase gelah betamah.

Wabillahi Taufik Walhidayah…..

Wassalamualaikum Warahmatullahi Wabarakatuh…..

Sp. Tetunyung
Selasa, 03-01-2012
Yusdi Darma

Beralih ke tautan asli: Klik Disini

LEAVE A REPLY

Please enter your comment!
Please enter your name here